CEBU CITY — Nag-una ang dakbayan sa Mandaue sa labing daghang nahipos nga samples atol sa gipahigayong strategic rapid testing ubos sa “Project Balik Buhay.”
Base sa datos sa Office of the Presidential Assistant (OPAV) niadtong Mayo 15, niabot na sa 99.4 percent ang turnout rate sa nahipos nga mga rapid samples.
Pasabot niini, anaa sa 11,561 ang nipaubos sa rapid testing gikan sa 11,632 ka mga target residents human sa kapin usa ka semanang pagpahigayon niini sa Mandaue City.
Gisundan kini sa dakbayan sa Lapu-Lapu nga anaa sa 73.80 ang turnout rate human misanong ang 7,732 ka mga indibidwal sa testing gikan sa 10,477 ka target residents.
Apan ubos ang turnout rate sa dakbayan sa Sugbo kung diin anaa kini sa 35.38 percent o 6,205 ang nipaubos sa testing gikan sa 17,536 ka mga target individuals.
Tungod niini nirekomendar ang chief pathologist sa Department of Health (DOH)-7 nga si Dr. Mary Jean Lorreche nga angayang i-extend ang strategic rapid testing og tulo ka adlaw.
Matud ni Lorreche nga pinaagi sa “sweeper testing,” balikan ang mga lugar nga adunay ubos nga turnout rates alang sa pagkuha og dugang pang rapid o blood samples.
Ni-awhag usab ang opisyal sa mga local government officials nga pakusgan pa ang information drive aron ma-awhag ang katawhan nga mopaubos sa rapid testing.
