Gipahibalo ni Senate President Pro Tempore Panfilo Lacson nga ang padayon nga pagkawala ni Sen. Ronald ‘Bato’ dela Rosa sa sesyon sa Senado usa sa mga butang nga hisgutan sa gikatakdang all-senators’ caucus sa Lunes.
Sumala ni Lacson, ang kasamtangang mga lagda sa Senado kinahanglan nga susihon pag-usab ug tan-awon kung nahiakop ba kini sa sitwasyon ni Dela Rosa.
Matud niini nga duna silay mga rules sa continuous absence sa committee sama nalang sa pagtangtang sa membership sa committee, apan sa plenary giingong wala silay mga lagda.
Gikumpirmar ni Senate President Vicente ”Tito” Sotto nga wala na si Dela Rosa sa Senado sukad Nobyembre 11, 2025, ug wala pa’y tino nga pahayag kung kanus-a siya mobalik.
Sa iyang adlawng natawhan, si Dela Rosa miingon nga siya naghulat sa tinuod nga pagpangita sa hustisya, kalabot sa posibleng warrant of arrest gikan sa International Criminal Court (ICC) tungod sa kasong krimen batok sa katawhan nga naglambigit kang kanhi Presidente Rodrigo Duterte.
Kon kahinumdoman, ang dokumento nga gipagawas sa ICC niadtong Pebrero naglista kang Dela Rosa ug Sen. Bong Go isip posibleng mga kauban sa kampanya sa war on drugs sa kanhi Presidente.
Dugang ni Lacson nga ang caucus maghisgot usab kon unsaon pagpakig-uban sa Senado sa Embahada sa China human sa tensyon tali sa mga opisyal sa Pilipinas ug China.
Miingon usab ang senador nga wala siyay plano nga modagan sa 2028 nga nasudnong eleksyon ug nagplano nga moretiro sa katapusan sa iyang termino sa 2031.
Gihimo ni Lacson ang mga pamahayag sa bag-ohay lang nga alumni homecoming sa Philippine Military Academy, diin miapil si Lacson isip miyembro sa Matatag Class of 1971, apan wala mitambong si Dela Rosa, usa ka gradwado sa Sinagtala Class of 1986.
Mitambong usab sa kalihokan si Joe Melencio Nartatez Jr., hepe sa Philippine National Police ug miyembro sa Tanglawdiwa Class of 1992.
