Dismayado si Acting Cebu City Mayor Raymond Alvin Garcia nga wala pa mahuman ang Guba Community Hospital, nga gitukod niadtong 2019, apan bisan human sa lima ka tuig, wala gihapon mahuman ang proyekto.
Kini ang nahimong pamahayag ni Garcia human sa iyahang pagbisita sa Guba Community Hospital niadtong Sabado, Hunyo 1, 2024.
Gitumbok niini nga nabalaka kini sa wala pa mahuman nga pasilidad, hinungdan nga nimando kini og imbestigasyon arun masuta ang rason sa pagkalangay sa paghuman sa tambalanan.
Makigtagbo kini kang CCMC Medical Director Peter Mancao, Cebu City Health Department head Daisy Villa, ug sa mga opisyal sa DOH aron i-update siya sa maong kalambuan.
Dugang pa niini nga ang Guba Community Hospital nagsilbi nga extension sa CCMC, nga mu-accommodate sa mga pasyente gikan sa bukirang barangay sa dakbayan sa Sugbo aron dili na kinahanglang moadto pa sa CCMC ug ubang tambalanan nga nahimutang sa kalungsoran.
Nasuta nga ang DOH sa Central Visayas nigahin og P15.79 milyones alang sa pag-upgrade ug pagkompleto sa healthcare facility, matod sa billboard nga gipakita sa gawas sa tambalanan.
Ang P15-million nga budget alang sa pagtukod og duha ka andana nga edipisyo nga adunay 25 ka ward, dental clinic, ug operating room.
