Mopakatap ang Armed Forces of the Philippines og mga barko ug eroplano sa West Philippine Sea.
Kini alang sa regular nga pagpahigayon sa Maritime ug aerial patrols sa Armed Forces sa maong lugar taliwala sa gipatuman nga unilateral fishing ban sa China.
Matud ni AFP Spokesperson, Col. Francel Margareth Padilla, nga ang katuyoan niini mao ang pagsiguro sa kaluwasan ug seguridad sa mga mananagat nga Pilipino nga mangisda sa West Philippine Sea.
Kung kahinumdoman, unang gipasiugda sa AFP nga dili nila ilhon ang bag-ong pamahayag sa China kalabot sa pagpatuman niini sa fishing moratorium sa WPS nga nahimong epektibo niadtong Mayo 1, 2024 ug molungtad hangtod sa Setyembre 16, 2024.
Dungan pa nga hugot nga gikondenar niini diin matud pa nga ang maong lakang sa China usa ka dakong kalapasan sa Maritime claims sa nasud ubos sa United Nations Convention on the Law of the Sea ug sa 2016 Arbitral decision.
