Gisalikway ni Armed Forces of the Philippines (AFP) Chief of Staff General Romeo Brawner Jr. ang panawagan sa militar nga bawion ang suporta niini kang Presidente Ferdinand “Bongbong” Marcos Jr.
Sa usa ka forum, gibutyag sa hepe sa AFP nga pipila ka mga retiradong opisyal sa Armed Forces ang miduol kaniya ug naningkamot usab nga kumbinsihon ang pipila ka mga batan-ong opisyal ug commander nga moapil sa nagkalain-laing porma sa interbensyon diin posibleng pinaagi sa kudeta o hunta militar aron “i-reset ang tibuok katilingban sa Pilipinas” o bawion ang suporta sa Presidente.
Ang anti-Marcos nga lakang nahitabo sa wala pa ang dinagkong protesta batok sa korapsyon kaniadtong Setyembre 21 pagkahuman sa pagpadayag sa mga anomaliya sa mga proyekto sa flood control projects.
Apan, matod sa hepe sa AFP, walay ingon niini nga mga kalihokan nga nahitabo sa kataas sa protesta.
Matod ni Brawner, isip chief of staff, masaligon siya nga walay sakop sa AFP ang maminaw sa panawagan sa pipila ka sektor, o indibidwal nga mangilabot tungod sa propesyonalismo nga naa sa Armed Forces.
Bisan pa man nga adunay ingon niini nga mga panawagan atol sa mga rally, matod niya nga ila kining gipadangat ngadto sa Presidente isip Commander-in-Chief ug matud niya wala matarog ang pagsalig sa Presidente sa AFP.
Kahinumduman nga una nang gihimakak sa Department of National Defense (DND) ang mga pagduda kalabot sa posibleng kudeta sa militar batok sa administrasyong Marcos.
