Usa ka maayong inisyatiba ang P20 matag kilo nga programa sa bugas humay nga gilusad sa Kabisay-an partikular sa Sugbo.
Gituohan ni Agri Party List Rep. Wilbert Lee nga dakong tabang ang nasangpit nga programa sa pagpagaan sa kabug-at sa mga katagilungsod nga anaa sa hilit nga bahin sa katilingban.
Matud ni Lee nga suportado niya ang maong lakang apan gihangyo sa gobyerno nga ipatuman ang P20 matag kilo nga programa sa bugas sa tibuok nasud.
Gipasiugda sa magbabalaod sa Bicolano nga dugay na niyang gipasiugda ang nasangpit nga inisyatiba aron matabangan ang mga lokal nga mag-uuma nga gikonsiderar nga mga sundalo sa food security.
Dugang niya nga iyang gisang-at ang House Bill 9020 Cheaper Rice Act sa Balay niadtong Agosto 2023.
Nalakip sa nasangpit nga sugyot nga ang kagamhanan mopalit og bugas sa mga lokal nga mag-uuma sa mas taas nga presyo ug dugangan og P10 gikan sa farm gate price aron masiguro ang kita sa mga mag-uuma ug ibaligya sa merkado sa mas baratong presyo.
Gipasiugda ni Rep. Lee nga gawas sa Cheaper Rice Act, ang mga long-term nga solusyon nga iyang gipresentar ngadto sa Kamara naglakip sa paghatag og suporta sa mga mag-uuma sama sa post harvest ug transport facilities ug pagdugang sa gidaghanon sa Kadiwa Centers diin ang mga mag-uuma direktang namaligya sa ilang mga produkto nga dili moagi sa abusadong middlemen.
Nagtuo si Lee nga kon mahatagan og igong suporta ug kompletong suporta ang mga lokal nga mag-uuma ug masiguro ang ilang kita, maningkamot sila nga motaas ang ilang produksiyon nga makapausbaw sa suplay ug makapaus-os sa presyo sa bugas hangtod nga mahalin ang bugas sa tag P20 matag kilo sa tibuok nasod.
