TOLEDO CITY-Patay ang usa lalaki ug naangol ang laing duha, human nga nagbangga ang duha ka motorsiklo sa dakbayan sa Toledo niadtong Huwebes, Nobyembre 2.
Ang kapulisan sa dakbayan sa Toledo mikompirmar nga nakadawat og alerto sa aksidente sa sakyanan sa Poloyapoy Street eskina Rafols ning dakbayan mga alas 4:40 sa kaadlawon.
Apan namatay ang usa sa mga drayber sa motorsiklo nga giilang si Xavier Kennedy Dogmoc.
Gideklarar sa mga sakop sa mirespondeng first-aid unit nga dead on the spot si Dogmoc tungod sa grabeng mga samad.
Si Dugmok nagmaneho sa usa ka motorsiklo nga kolor itom.
Sa pikas bahin, ang laing drayber ug ang iyang pasahero daling gidala sa duol nga tambalanan human nakaangkog samad.
Giila sila nga si Kent Oliver Villarin Villarta ug Chris Rabanes Racaza, pulos residente sa dakbayan sa Toledo.
Base sa inisyal nga findings sa mga otoridad, ang epekto sa pagbangga nakapalupad sa namatay nga drayber una pa mitugpa sa sementadong simento pipila ka metros ang gilay-on.
Sa laing bahin, ang mga awtoridad nagpadayon sa paghimo og dugang nga imbestigasyon aron masuta ang mga panghitabo nga misangpot sa aksidente sa Toledo.
