Padayon misaka ang Pinay tennis star nga si Alex Eala sa world women’s tennis scene human nakab-ot ang iyang bag-ong career-best WTA ranking nga No. 70, ang iyang pinakataas nga ranggo hangtod karon.
Ang 19-anyos nga si Eala misaka sa ranggo human sa iyang kampanya sa Mutua Madrid Open, diin iyang gipildi si Victoriya Tomova sa Bulgaria sa unang hugna.
Niadtong Marso, ang kadaugan ni Eala batok kang Iga Swiatek sa Miami Open maoy nagtukmod kaniya ngadto sa semifinals sa WTA1000 tournament, usa ka makasaysayanong kadaugan sa Pilipinas ug usa ka stepping stone alang sa iyang pagsulod sa Top 100 sa WTA rankings.
Gilauman nga moapil ang atleta sa Italian Open gikan sa Mayo 6-18, diin mahimo niyang atubangon pag-usab sila Jessica Pegula ug Madison Keys.
Gawas niini, si Eala gikatakda usab nga makigtigi sa Roland Garros (French Open) gikan sa Mayo 25 hangtod Hunyo 8, dungan sa iyang ika-20 nga adlawng natawhan karong Mayo 23, 2025.
