Daling gipildi ni Filipina tennis ace Alex Eala si Patcharin Cheapchandej sa Thailand, 6-1, 6-0, sa unang duwa sa iyang kampanya sa 2026 Aichi-Nagoya Asian Games gahapong adlawa, sa Higashiyama Park Tennis Center Japan.
Bisan pa sa mga pagkalangan sa iskedyul ug pagbalhin sa venue tungod sa dili maayong panahon, nahuman ni Eala ang duwa sulod lang sa 55 ka minuto.
Gipakita sa 21-anyos nga kampiyon ang iyang dominasyon pinaagi sa pagposte og walo ka sunod-sunod nga puntos sa ikaduhang set aron masiguro ang iyang pwesto sa quarterfinals.
Matod ni Eala, naanad na siya sa mga wala damha nga kausaban atol sa mga duwa ug kinahanglan lang niya nga magpabiling andam, mapailubon, ug flexible sa bisan unsang sitwasyon.
Ang representante sa Pilipinas gikatakdang makigsangka batok kang Joanna Garland sa Chinese Taipei sa round of 8.
