Nagtapos sa ika-unom nga puwesto ang Philippine men’s artistic gymnastics team sa ginahimong pinal nga kompetisyon sa 2026 Asian Games nga gipahigayon sa Nagoya General Gymnasium sa Hapon.
Pinaagi sa pagpanguna sa two-time Olympic gold medalist nga si Carlos Edriel Yulo, nakakuha ang Pilipinas og kinatibuk-ang score nga 227.359.
Tungod niini, nabuntog sa nasod ang Vietnam ug Singapore gikan sa walo ka mga team nga nagtigi.
Nagsugod og maayo ang Team Pilipinas sa dihang nakatala sila og 38.099 sa rings ug 42.365 sa vault. Apan miusos gamay ang ilang momentum sa parallel bars diin nakakuha lang ang koponan og 36.099.
Nakatabang sa maong kategorya silang Juancho Miguel Besana (10.000), Karl Jahrel Eldrew Yulo (11.933), ug Carlos Yulo (14.166).
Sa horizontal bar, nakatala ang Pilipinas og 36.965, samtang nakakuha sila og 38.199 sa floor exercise lakip na ang 14.266 nga puntos gikan ni Carlos Yulo.
Sa katapusang pommel horse event, nagtapos ang team sa score nga 35.632 tungod sa mga puntos gikan kanila ni Zachary Nunez (12.333), Besana (11.933), ug Eldrew Yulo (11.366).
Samtang, nagpabilin nga kampeon ang China human makuha ang ilang ikatulo nga sunod-sunod nga bulawang medalya sa maong event pinaagi sa total nga iskor nga 255.095.
