CEBU CITY- Nasikop ang usa ka amahan, iyang anak ug uyab, atol sa buy-bust operation nga gipahigayon sa Kapulisan sa Mambaling police station sa dalan P. Fatima, Barangay Duljo Fatima, dakbayan sa Sugbo, alas 3:40 sa kaadlawon karung adlawa Martes, Pebrero 18, 2025.
Giila ang mga dinakpan nga sila si Henry Thomas Cala Saso, 51, anak nga si Vinz Henry Saso, 31, ug uyab niini nga si Mary Ann Garcia, 48, kinsa gikatahong kanhi “media” personality sa Sugbo.
Sa pakighinabi sa Bombo Newsteam kang Police Lieutenant Col. Maria Theresa Macatangay, ang tigpamaba sa Cebu City Police Office (CCPO), gitin niini nga nasakmit sa mga operatiba ang mga pakete sa gituohang shabu nga nitimbang og 252 gramos ug gibanabanang mobalor og P1,731,600.00.
Dugang pa niini, nga ang operasyon gihimo sa mga personahe sa Station Drug Enforcement Unit, pinangulohan ni Police Lieutenant Lyndon Mondragon, ang deputy station commander sa Mambaling police station.
Nahimo ang buy-bust human nakadawat og impormasyon ang mga otoridad nga naglambigit sa mga suspek sa pagpamaligya og ilegal nga drugas.
Gihatagan niini og gibug-aton nga ang pagmaligya sa ginadili nga druga walay maayo nga sangputanan, hinungdan nga ilaha nalang kini nga undangon og manginabuhi sa tinarong nga pamaagi.
Gidugang sa opisyal, nga ang kapulisan sa Dakbayan sa Sugbo nagpadayon sa ilahang subsub nga operasyon sa mga nagkadaiyang Krimen, ilabi na sa ‘Buy-bust’ operation, kana aron masiguro ang hapsay ug luwas nga Dakbayan alang sa tanang mga sugbuanon.
Ang mga nasakmit nga drug substance, uban ang uban pang nakumpiska nga mga ebidensiya, gisumite sa Regional Forensic Unit 7 alang sa pagsusi ug pagtuki.
