BAGUIO CITY-Nahatag na ang gipanawagan nga hustisya human mapatud-an sa korte nga sad-an ang tulo ka kanhi kadete sa Philippine Military Academy (PMA) sa kamatayon sa ilang kadete nga si Darwin Dormitorio niadtong 2019.
Kini mao sila si kanhi PMA 3rd Class Shalimar Imperial Jr. ug Felix Lumbag Jr., ug 3rd Class Julius Carlo Tadena.
Apan, kung adunay usa ka tawo nga wala makasaksi niini nga hustisya, kini ang amahan sa biktima nga si William Dormitorio, usa ka retiradong Army lieutenant colonel ug miyembro sa PMA Class of 1974, nga namatay usa ka semana sa wala pa ang huwes nagpagawas sa desisyon.
Ang 75-anyos nga amahan namatay kaniadtong Hulyo tungod sa cardiac arrest- usa ka sakit nga kapalaran nga wala niya masaksihan ang pagsirado sa kaso sa iyang 20-anyos nga anak nga namatay tungod sa hazing.
Si Dormitorio gikan sa Cagayan de Oro ug sakop sa PMA Madasigon class of 2023.
Siya namatay niadtong Septiyembre 18, 2019 sa PMA Hospital human napalgang walay panimuot sulod sa lawak sa Mayo Hall sa PMA sa Fort Del Pilar.
Base sa record sa korte, gisilotan si Dormitorio sa iyahang senior cadet tungod kay nawalan niini ang usa ka pares sa botas sa iyahang senior cadet.
Duha pa lang siya ka buwan sa academy dihang nahitabo ang insidente.
Nadiskobrehan usab sa mga awtoridad nga usa ka buwan sa wala pa siya mamatay, si Dormitorio ug ubang mga recruit sa PMA gipugos nga mopailalom sa electrocution via taser ug uban pang physical abuse sa mga kamot sa ilang mga upperclassmen.
