Naghilak ug puno sa kasakit ang usa ka amahan nga karon nagbangotan sa pagkawala sa iyang duha ka anak, human gibanlas sa baha ang ilang balay atol sa kusog nga hagupit sa Bagyong Tino sa Liloan, Cebu.
Sa eksklusibong pakighinabi sa Bombo Newsteam, si Kenrick Louie Benting, usa ka seaman, naghilak nga nagsaysay nga dako ang iyang pagmahay nga misakay pa siya sa barko.
Matod pa niya, kung nagpabilin pa unta siya sa balay, basin naluwas pa niya ang iyang pamilya.
Karon, nag-antos siya sa kasakit ug kaluoy, samtang padayon pa ang pagpangita sa lawas sa iyang duha ka anak nga hangtod karon wala pa gihapon makit-i.
Gibanlas sa kusog nga baha ang ilang panimalay sa Barangay Cabadiangan, Liloan, atol sa kusog nga pag-ulan ug pagbaha nga gidala sa Bagyong Tino.
Gipaambit ni Benting nga wala’y bahandi o kwarta sa kalibutan nga makatumbas sa gugma ug kalipay nga gihatag sa iyang mga anak kaniya.
Matod pa niya, guba man ang balay ug nawala ang tanan nga kabtangan, mas lisod dawaton nga nawala usab ang duha ka kabahin sa iyang kinabuhi.
Apan bisan sa grabe nga kasakit, nagpabilin gihapon ang iyang pagtuo sa Ginoo.
Nasabtan niya nga ang kinabuhi pinahulam lamang ug nga walay bisan kinsa nga tinuod nga tag-iya niini.
