PROVINCE OF CEBU- Patay ang amahan ug ang iyang silingan human kini gidunggab sa iyahang kaugalingong anak didto sa Barangay Luka, lungsod sa Oslob kaganinang sayo sa buntag, Pebrero 21, 2025.
Giila ang suspek nga si Randy Dinaguit, 23 anyos, lalaki, ulitawo, tiggama og tangkal sa manok, ug residenti sa naasoyng dapit.
Samtang ang mga biktima giila nga sila si Marciano Dinaguit, 70 anyos, amahan sa suspek ug si Summy Toledo Armalinto, 75 anyos, biyudo, silingan nila.
Sa pakighinabi sa Bombo Newsteam kang Police Major Jude Cebrero, hepe sa Oslob Police Station, nga adunay nanawag sa ilahang buhatan ug nipahibalo nga adunay insidente sa pagpanunggab nga nahitabo sa Barangay Luka, Oslob, Cebu.
Subay sa nasangpit nga taho, ang mga personahe sa maong estasyonan mipaingon sa dapit sa insidente aron sa pagsusi niini.
Sa pag-abot sa kapolisan sa crime scene, ang suspek nga si Randy nag-wild.
Hinungdan, nga gisulayan kini pagpakalma sa mga mirespondeng personel, apan giatake hinuon sila hinungdan nga ilang gipusil ang suspek sa ubos nga bahin sa lawas nga miresulta sa pagka-angol sa iyang tiil ug mga kamot, rason nga nasikop kini sa mirespondeng mga pulis.
Sa inisyal nga imbestigasyon nga gihimo, nasayran nga mga alas 5:30 sa buntag Pebrero 21, 2025, nakamata ang saksi nga si Marvy Dinaguit tungod sa kasaba sa gawas sa ilang balay.
Nilakaw siya sa gawas sa ilang balay ug iyang nakita ang iyang igsuon nga si Randy Dinaguit, nga nagbalik-balik pagdunggab sa iyang amahan nga si Marciano Dinaguit sa nagkadaiyang parte sa iyang lawas.
Samtang gihimo ang imbestigasyon, nitaho sa kapolisan ang ilang silingan nga si Carlos Las Pobres nga ang iyang ugangan nga si Summy Toledo Armalinto, 75 anyos, wala nay kinabuhi nga nagbuy-od sa yuta gawas sa iyang kaugalingong balay.
Daling gidala ang suspek ug ang duha ka biktima sa Oslob District Hospital aron matambalan apan ang nag-atiman nga doktor nga si Dr. Excel Jimss M Roche nideklarar nga dead on arrival ni Summy Armalinto ug si Marciano Dinaguit gideklarar usab nga dead on arrival ni Dr. Alexa Nicole O Ceniza.
Sa wala pa ang insidente ang suspek nagduda nga gisumbong siya sa polis kay nanguha siya og kahoy, aron maghimo og kaugalingon balay, nga nahimong hinungdan sa iyahang pagpatay sa kaugalingong amahan.
Sa pagkakaron anaa pa sa tambalanan ang suspek alang sa dugang medikal nga eksaminasyon, samtang giandam na sa kapolisan ang tukmang kaso sa suspek nga giingong adunay sakit sa pangisip nga usa sa mga hinungdan sa duguong krimen nga nahimo.
