CEBU CITY- Gipasabot sa usa ka medical doctor nga ang hantavirus kasagarang gidala sa mga ilaga nga anaa sa umahan ug mahimong motakod sa tawo pinaagi sa pag-inhale sa uga nga ihi o hugaw nga mapalid sa hangin.
Sa eksklusibong pakighinabi sa Bombo Radyo Cebu News Team, gipahayag ni Dr. Rene Josef Bullecer nga ang hantavirus usa ka zoonotic disease o sakit nga gikan sa hayop ug mahimong motakod ngadto sa tawo. Matod niini, ang virus mahimong mosulod sa lawas sa tawo kung ma-inhale ang partikulo gikan sa uga nga ihi o hugaw sa ilaga.
Dugang pa ni Bullecer nga hangtod karon wala pa’y klarong pamahayag gikan sa World Health Organization (WHO) ug mga eksperto sa Europe kon asa gayud nagsugod ang maong virus ug kon adunay direct human-to-human transmission sulod sa cruise ship diin adunay mga namatay nga pasahero.
Giklaro usab sa doktor nga wala pay angay kabalak-an sa publiko tungod kay wala pa makompirma kon nagtakdanay ba ang mga pasahero sa barko. Sumala niini, gipahigayon na usab ang thorough inspection sa barko apan wala’y nakitang ilaga nga posibleng nagdala sa virus.
Giingon pa ni Bullecer nga posible nga nakuha ang virus sa usa sa mga lugar nga gibisita sa barko atol sa dugay nga paglayag niini sa kadagatan.
Matud pa sa report, tulo ka langyawng pasahero na ang namatay samtang duha pa ka indibidwal nga adunay sintomas sa hantavirus ang gi-evacuate gikan sa luxury cruise ship nga natanggong sa West Africa. Bisan pa niini, gipasalig sa WHO nga ubos ra ang risgo sa publiko tungod kay dili dali mokatap ang hantavirus tali sa mga tawo.
