CEBU CITY-Patay ang usa ka amahan nga giilang si Zorovavel og ang iyang anak nga si Zyphaniah Edoloverio human sa pagpangdunggab sa Sitio Suba, Barangay Talavera Toledo City pasado alas 4 kagahapong adlawa, Disyembre 13, 2023, samtang naa sa kritikal nga kondisyon ang laing kauban nila sa balay.
Nadakpan ang suspect nga si Kevin Avelis atol sa hot pursuit nga gipahigayon sa kapolisan diin nasayran nga adunay kaso nga trespassing sa amahang Edoloverio tungod sa pagsige og sunod-sunod sa iyang anak.
Nasayran sa imbestigasyon nga misulod ang suspect sa panimalay sa mga Edoloverio tungod plano niining patyon ang 18-anyos nga si Zyphaniah Edoloverio human gibasted siya niini sa kamakadaghan nga higayon ug nasayran niya nga duna na kini hinigugma.
Sa pagsulod sa suspect sa balay una niyang gidunggab si Zyphaniah ug ang uyab niini nga si Gerley Navarro, 18-anyos.
Sa pagsinggit og tabang ni Zyphaniah, daling midagan sa ilang kwarto ug mitabang nila ang iyang amahan nga si Zorovavel apan gidunggab kini dayon sa suspect hinungdan sa kamatayon niini.
Pasakaan si Avelis og kasong double murder ug frustrated murder tungod sa paghimo sa maong krimen.
