CENTRAL VISAYAS- Gikatahong usa sa lima nga namatay sa engkwentro sa lungsod sa Cauayan, Negros Occidental niadtong Mayo 16, usa ka Sugboanon, nga nailhang si Francis Vince Dingding nga gikataho nga taga Cebu City.
Base sa mga inisyal nga impormasyon, migradwar si Dingding, sa University of the Philippines-Cebu, diin nagserbisyo siya isip student councilor sa academic year 2014-2015.
Matud ni Lieutenant Colonel Israel Galorio, ang tigpamaba sa Visayas Command nga adunay nadawat nga report ang 15th Infantry Batallion sa nahisgutang lugar nga aduna gayuy mga nagbase nga gikatahong miyembro sa New Peoples Army.
Miresulta kini sa sunod-sunod nga 4 ka higayon nga engkwentro rason nga nakapatay sa 5 ka miyembro niini ug nakuhaan og mga high-powered firearms gikan niini.
Sa Inisyal nga report nga nadawat, gisuwayan una pagsusi sa mga utoridad ang gipuy-an ni Ding-Ding aron kumpirmahon sa mga tagtungod, dugang pa nga kabahin ang maong sugboanon sa unang tulo ka mga nakalas nga na-identify sa mga awtoridad.
Moabut sa 10 ka mga miyembro sa NPA ang gikatahong nakaengkwentro sa mg tropa sa kasundalohan nga gidudahang nagpahigayon og extortion activities.
Sa bahin usab sa mga kasundalohan, wala hinouy samdan sa maong engkwentro.
Nanawagan usab ni Galorio sa mga Sugboanon, nga makanunayong imonitor ang ilang mga anak, hilabi na sa pagsusi sa mga gikalambigitan nga mga organisasyon aron malikay sa susamang kaso, gumikan kay nagkalapad ang recruitment force sa mga grupo sa CPP-NPA.
