CEBU – Mukabat sa 2,000 ka mga binhi ang gitanum sa “Run To Plant 2019” sa dakbayan sa Naga kaganihang buntag isip pagsaulog sa ilahang Arbor Day 2019.
Gilangkuban ang maong kalihukan sa kapin 30 ka mga kompanya nga anaa sa dakbayan, mga pribado ug pangpubliko nga tunghaan, ingun man ang lokal nga kagamhanan.
Nahimung planting area ang Barangay Pangdan, Barangay Alpaco, ug Barangay Sindulan, ang ground zero sa nahitabung killer landslide niadtung nakalabay nga tuig.
Gibutyag ni Jehon Ubas, CENRO-Naga, nga ang Apo Land and Quarry Corp., ang mi-sponsor sa paghatag ug mga binhi nga gitanum.
Matud pa nga gilangkuban sa nara, kalachuchi, kawayan ug mahogany, ang gitanom sa nahisgutang mga barangay.
Gipasabut usab ni Ubas nga ang Arbor Day usa ka ordinansa nga napasar niadtung 2014 nga tuyu mao ang pagpahigayun ug tinuig nga tree planting sa dakbayan.
