PROVINCE OF CEBU- Walay natala nga casualty sa lungsod sa Argao, Southern Cebu, human miagi ang Bagyong Basyang kagahapon sa hapon, Enero 6, 2026.
Sa pakighinabi sa Bombo Newsteam kang Kent Rizon, Head sa Argao Municipal Disaster Risk Reduction and Management Office (MDRRMO), nga minor incidents lamang ang ilang namonitor atol sa pag-landfall sa bagyo, base sa opisyal nga tala sa ilang buhatan.
Lakip sa natala ang pipila ka minor landslide sa nagkadaiyang dapit sa lungsod.
Bisan pa niini, walay natabunan, nasamdan, o namissing nga mga residente atol sa maong mga panghitabo.
Kini bisan paman, nga nakatala ang Argao MDRRMO og pag-awas sa suba sa Argao tungod sa kusog ug padayon nga pag-uwan, nga miresulta sa pagbaha sa pipila ka mga barangay.
Tungod niini, gilunsad ang preemptive evacuation sa mga apektadong lugar, lakip ang Barangay Canbanua, diin duha ka bata ang gilayon nga na-rescue ug luwas ang kahimtangan.
Matod pa ni Rizon, kapin sa usa ka libo ka indibidwal ang nabakwit atol sa pag-agi sa Bagyong Basyang.
Miapil usab ang CDRRMO sa clearing operations sa mga kadalanan nga naalihan sa nangatumba nga kahoy aron mapaspas ang pagbalik sa normal nga trapiko.
Nagpasalamat ang Argao LGU sa paspas nga koordinasyon sa tanang ahensya ug responders nga mitabang sa pagseguro sa kaluwasan sa katawhan.
