Gisibog sa Sandiganbayan Third Division ang arraignment ni kanhi senador Ramon Bong Revilla Jr. ug unom pa ka kaubang akusado sa kasong malversation nga may kalabutan sa giingong ₱92.8-milyon nga ghost flood control project sa Pandi, Bulacan.
Sumala kang Third Division chairperson Associate Justice Karl Miranda, gikinahanglan ang pag-postpone tungod kay adunay pa’y mga pending nga mosyon ang depensa nga nagkuwestiyon sa merito sa kaso.
Ang arraignment gi-reset sa Pebrero 9, 2026, alas 8:30 sa buntag. Ang laing kaso sa graft nga giatubang ni Revilla gikatakda usab alang sa arraignment alas 1:30 sa hapon sa samang adlaw.
Gimando ni Miranda ang mga abogado sa depensa nga isumite ang tanan nilang nahibiling mosyon sa dili pa ang Enero 26, samtang gimandoan ang mga piskal sa gobyerno nga mosumite sa ilang mga komento sa dili pa ang Enero 28.
Dugang pa niya nga ang mga mahistrado sa Sandiganbayan mobisita sa Quezon City Jail Male ug Female Dormitory sa Barangay Payatas karong Biyernes, Enero 23, aron susihon ang kahimtangan sa mga dinakpan, lakip na ang mga akusado sa giingong anomalous flood control projects.
