Nagtumong ang Association of Southeast Asian Nations (ASEAN) sa pagpalig-on sa seguridad sa enerhiya ug pagkaon samtang ang mga tensyon sa geopolitikal sa Middle East naghulga sa kalig-on sa rehiyon, matod ni Trade Secretary ug ASEAN Economic Community (AEC) Council Chair Cristina Roque niadtong Huwebes.
Si Roque miingon nga ang ASEAN nag-uswag sa pag-ratipika sa ASEAN Framework Agreement on Petroleum Security (APSA) isip kabahin sa mga paningkamot sa rehiyon aron maatubang ang nagpadayon nga panagbangi sa Middle East.
Gidugang pa niya nga ang APSA gipadayon aron mapadali ang koordinado nga pagpaambit sa gasolina sa emerhensya ug kolektibong mga tubag sa pagkabalda sa suplay.
Gani, ang AEC Council nagkita niadtong Huwebes aron masusi ang epekto sa panagbangi sa Middle East, diin ang mga ministro nag-ingon nga nagkataas ang mga risgo sa kalig-on sa ekonomiya.
Samtang, gitataw ni Roque nga ang mga diskusyon naka-focus sa pagpadali sa ASEAN Power Grid, pagsiguro sa suplay sa enerhiya alang sa mga importanteng serbisyo sama sa pag-atiman sa panglawas, ug pagpalig-on sa koneksyon sa enerhiya.
Alang sa Pilipinas, siya miingon nga ang Department of Trade and Industry (DTI) mopadali sa pag-apruba sa mga pamuhunan sa renewable energy.
Tumong usab sa ASEAN nga malikayan ang mga lakang nga nagpugong sa pamatigayon sama sa pagdili sa pag-eksport sa mga importanteng produkto, pagpadali sa mga kasabutan sa libreng pamatigayon aron maibanan ang mga bottleneck, ug mapalambo ang koordinasyon sa supply chain.
Inun man nga ang bloc mopalig-on pa sa seguridad sa pagkaon ug mopalig-on sa suporta alang sa micro, small ug medium enterprises (MSMEs).
Gitino pa niini nga ang mga MSME mao ang haligi sa mga ekonomiya sa ASEAN, apan sila usab ang labing naladlad atol sa mga kausaban, busa ang pagpalig-on sa access sa financing ug suporta sa liquidity mahinungdanon aron mapadayon sila nga naglihok ug mapanalipdan ang mga trabaho.
