Gipasalig sa Association of Southeast Asian Nations (ASEAN) nga ang agenda sa mga lider alang sa ika-48 nga ASEAN Summit nga gipahigayon niadtong Biyernes, Mayo 8, nahimong klaro, hapsay, ug naka-pokus sa pagkab-ot og konkretong mga resulta alang sa rehiyon.
Atol sa ika-38 nga ASEAN Coordinating Council (ACC) Meeting nga gipahigayon sa Sugbo sa niaging mga adlaw, si Foreign Affairs Secretary Ma. Theresa Lazaro niingon nga ang mga miyembro nirepaso sa pagpatuman sa mga nangaging desisyon ug mga importanteng isyu sa ASEAN sa wala pa gisugdan ang summit.
Sumala ni Lazaro, ang maong miting nagtumong sa pagsiguro nga ang mga lider naka-focus sa mga lakang nga makahatag og makahuluganong resulta sa tibuok rehiyon sa Southeast Asia.
Gipasiugda usab sa kalihim ang kamahinungdanon sa panaghiusa, kalig-on, ug kooperasyon sa ASEAN taliwala sa mga hagit sa seguridad sa enerhiya, seguridad sa pagkaon, ug ang proteksyon sa mga lungsoranon sa matag nasod.
Dugang pa ni Lazaro, ang summit nag-focus sa pagpatuman sa ASEAN Community Vision 2045 aron mas mapalig-on pa ang koneksyon ug kooperasyon sa rehiyon sa umaabot nga katuigan.
Ang Pilipinas mao ang nanguna sa maong panagtigom isip 2026 ASEAN chair ubos sa administrasyon ni Presidente Ferdinand Marcos Jr.
