Makigtagbo ang foreign minister sa Myanmar sa iyang mga katugbang gikan sa mga nasud nga miyembro sa ASEAN sa Bangkok karong Domingo, sumala sa Vietnam Ministry of Foreign Affairs.
Ang maong panagtagbo giisip nga usa ka lakang sa Myanmar aron makabalik sa diplomatikong pakig-uban sa rehiyon.
Kini human napahilayo ang Myanmar sa Association of Southeast Asian Nations (ASEAN) sukad sa kudeta nga militar niadtong 2021 nga mipalagpot sa napiling gobyerno ni Aung San Suu Kyi, nga misangpot sa nagpadayon nga civil war sa
nasud.
Niadtong Abril, gi-install isip civilian president ang lider sa junta nga si Min Aung Hlaing human sa kontrobersyal nga eleksiyon, samtang ang Thailand nanguna sa mga paningkamot aron maibalik ang normal nga relasyon sa Myanmar.
Bisan dili pormal ang panagtagbo, giingon ni Richard Horsey, senior Asia adviser sa International Crisis Group, nga ang pagtambong ni Myanmar Foreign Minister Tin Maung Swe nagpakita sa usa na usab ka kausaban sa baruganan sa ASEAN.
Apan matod niya, isip kasamtangang chair sa ASEAN, ang Pilipinas ang adunay katapusang desisyon kon imbitahon ba si Min Aung Hlaing sa umaabot nga mga kalihokan sa organisasyon, apan wala kini’y kasiguruhan.
Ang maong panagtagbo sa Bangkok misunod sa pagbisita ni Min Aung Hlaing sa Laos sa miaging semana, nga gihulagway ni Horsey isip posibleng sinugdanan sa pagbag-o sa dugay nang baruganan sa ASEAN nga dili i-normalize ang relasyon niini sa Myanmar.
