Labing menos 27 ka tawo ang namatay samtang 63 ang nasamdan sa sunog nga miulbo sa usa ka pub sa Bangkok, Thailand.
Matod sa mga awtoridad, nahitabo ang insidente sa Chatuchak District sa kaulohan sa Thailand.
Sa inisyal nga imbestigasyon ug mga testimonya sa mga nakaluwas, dali nga mikaylap ang baga nga aso human miulbo ang sunog, nga maoy hinungdan sa grabeng kaguliyang sulod sa establisemento.
Daghang mga kostumer ang misulay sa pag-ikyas pinaagi sa pagdagan paingon sa likod nga bahin sa pub duol sa mga comfort room aron mangitag gawas.
Apan, sumala sa mga opisyal, walay fire exit ang maong bahin sa establisemento, hinungdan nga daghang tawo ang natanggong sulod sa pub.
Padayon pa ang imbestigasyon sa mga awtoridad aron matino ang eksaktong hinungdan sa sunog ug masuta kon adunay nalabag nga mga regulasyon sa fire safety ang tag-iya sa establisemento.
