Pito ka tawo ang kumpirmadong namatay, lakip na ang 14-anyos nga suspek nga giingong responsable sa pagpamusil, samtang 15 pa ang nasamdan human nahitabo ang pagpamusil sa usa ka eskwelahan sa gawas sa Bangkok, Thailand, niadtong Agosto 7, 2026.
Nahitabo ang insidente sa Debsirin Nonthaburi School sa distrito sa Bang Kruai, probinsya sa Nonthaburi, nga nahimutang sa amihanan-kasadpan sa Bangkok.
Ang suspek usa ka 14-anyos nga estudyante sa maong eskwelahan.
Gikatahong migamit siya og 9mm nga pusil nga iya sa iyang apohan.
Sumala sa kapulisan, sa wala pa siya miadto sa eskwelahan, gipusil ug gipatay sa suspek ang iyang mga apohan sa ilang pinuy-anan.
Pagkahuman niini, misulod siya sa eskwelahan niadtong buntaga ug nagpabuto og kapin sa 26 ka bala.
Nagpahinabo kini og dakong kahadlok ug kagubot samtang nanago ang mga estudyante sulod sa ilang mga classroom.
Lakip sa pito ka namatay ang tulo ka magtutudlo, duha ka estudyante ug ang duha ka apohan sa suspek.
Human sa insidente, nakit-an nga patay ang suspek human sa gikatahong paghikog gamit ang maong pusil.
Samtang, 15 ka tawo ang nasamdan, diin kadaghanan kanila nasamdan samtang naningkamot sa pag-ikyas gikan sa lugar.
Duha sa mga nasamdan ang anaa sa kritikal nga kondisyon.
Sumala sa Department of Foreign Affairs (DFA), walay Pilipino nga nalambigit o nasamdan sa maong insidente.
Padayon ang imbestigasyon sa Royal Thai Police aron matino ang motibo luyo sa maong makalilisang nga pagpamusil.
