PROVINCE OF BOHOL- Malinawon ug malampuson nga nahuman ang ASEAN Finance Ministers’ and Central Bank Deputies’ Meeting Working Group ug uban pang kaubang miting nga gipahigayon gikan Pebrero 9 hangtod 13, 2026 sa Panglao, Bohol matud pa sa Police Regional Office 7.
Kung diin, sa lima ka adlaw nga high-level international gathering, nagtigom ang mga opisyal sa ASEAN finance officials, central bank deputies, ug mga delegado alang sa serye sa mga importanteng diskusyon.
Gikan sa pag-abot sa mga delegado hangtod sa katapusang sesyon sa miting, walay natalang dagkong insidente.
Ang security operations gipangulohan sa Site Task Group Central Visayas sa liderato ni PBGEN Redrico A. Maranan, Regional Director sa PRO7.
Liboan ka kapulisan ang gipakatap sa nagkalain-laing strategic areas sa Panglao ug ubang bahin sa Bohol, lakip ang mga venue, billeting areas, entry ug exit points, mga dagkong dalan, coastal zones, ug airspace corridors. Gigamit usab sa PRO7 ang land, sea, ug air assets sama sa patrol vehicles, maritime units, air support, K9 teams, intelligence operatives, ug specialized response forces.
Gipasalamatan ni PBGEN Maranan ang tanang personnel nga nalambigit sa security operations.
Iyang gipahayag usab ang pasalamat sa katawhan sa Bohol ug sa local government units tungod sa ilang kooperasyon.
Gihatagan niini og gibug-aton nga ang malinawon nga pagtapos sa ASEAN Finance Meetings nagpamatuod sa kahanduman ug kakayahan sa PRO7 sa pagseguro sa dagkong international events, ug nagpalig-on sa reputasyon sa Central Visayas isip luwas ug kasaligan nga venue alang sa global engagements.
