Hugot nga gihimakak sa Ministry of Foreign Affairs and International Cooperation sa Cambodia nga ang pugante nga negosyante nga si Charlie “Atong” Ang anaa sa nasud, sukwahi sa naunang hilaw nga impormasyon gikan sa mga awtoridad sa Pilipinas bahin sa giingong iyang nahimutangan.
Sa usa ka pahayag sa ilang social media page, ang Cambodian foreign ministry miingon nga opisyal nga gikumpirmar sa ilang tigpamaba nga si Ang wala sa Cambodia ug walay record sa iyang pagsulod o paggawas sa naasoy nga nasud.
Gihimo sa ahensya ang pahayag aron ipanghimakak ang mga report sa media nga si Ang giingong nagtago sa Cambodia, human sa balita nga usa ka team sa pulis gikan sa Pilipinas ang gipadala aron mangita sa pugante.
Samtang gipaambit ni Interior Secretary Jonvic Remulla, nga girespeto sa gobyerno sa Pilipinas ang pahayag sa Cambodia bahin sa isyu.
Apan, giinsistir sa kalihim nga ang pulis magpadayon sa pagpangita kang Ang.
Nakapagawas na kaniadto og mga warrant of arrest batok kang Ang ug uban pa kalabot sa nagkalain-laing mga kaso sa kidnapping with homicide ug kidnapping ug serious illegal detention, kalabot sa nawala nga mga sabungero.
