Gikuwestiyon ni Former Presidential Spokesperson Atty. Harry Roque kabahin sa pagkansela sa iyang pasaporte ug ang pagdeklarar kaniya nga usa ka ‘pugante’ sa korte sa Pasig City.
Sa usa ka online post, gipaambit niya ang iyang petisyon nga gisang-at sa Court of Appeals aron hagiton ang desisyon sa Pasig City Regional Trial Court, diin sa maong petisyon, nagtinguha kini nga hangyoon ang Court of Appeals nga mag-isyu og Temporary Restraining Order aron mahunong ang pagpatuman sa ‘rulings’ sa korte.
Nagtuo ang kampo ni Atty. Roque nga ang iyang mga katungod gilapas ug ang pagkansela ug pagdeklara kaniya isip usa ka pugante walay legal nga basehan.
Sa petisyon, giangkon sa kanhing presidential spokesperson nga ang Pasig RTC nakahimo og grabeng pag-abuso sa diskresyon sa mga resolusyon nga gi-isyu niini niadtong Nobyembre 2025 ug Pebrero 2026.
Miingon siya nga kini tungod kay ang iyang mga katungod sa due process, presumption of innocence ug kagawasan sa pagbiyahe wala giila.
Gidugang ni Atty. Roque nga ang korte wala usab moila sa iyang padayon nga hangyo nga hatagan og asylum sa Europe, nga kinahanglan sundon sa Pilipinas ubos sa International Law.
Mahinumduman nga ang maong abogado nag-atubang og kasong qualified human trafficking nga may kalabutan sa operasyon sa usa ka ilegal nga POGO hub sa Porac, Pampanga.
