CEBU CITY-Wala lang matud pa nasabtan ni Presidential Spokesperon Atty. Salvador Panelo ang senate probe kalabot sa mga ‘ninja cops’ hinungdan nga giingon niini nga pamulitika lang kini.
Tubag kini sa senate blue ribbon chairman nga si Senator Richard ‘Dick’ Gordon sa dihang nahinabi sa Bombo Radyo Cebu.
Matud ni Gordon, dili niya batasan mutira og tao hinungdan nga dili niya tirahon si Panelo apan iyang gipasabot nga kung pamulitika lang ang ilang gihimo sa senado, dili na unta sila magpadala pa ngadto ni Presidente Duterte sa ilang report kalabot sa executive session.
Sayod matud pa ang pangu sa tanang nahitabo sa session ug open kini sa publiko.
Gitataw usab sa senador nga matahi na ugma ang dagan sa senate probe tungod kay duna na matud pa’y bago nga mga testigo.
Mensahe usab ni Gordon sa publiko, nga magfocus sa issue ug angayang malipay nga na madiskubre ang sama niining iskandalo sa PNP para matarong na kini sa umaabot.
Kung duna matud pa makalapas sa balaud sa PNP, angayan lamang tangtangon.
