Gipahibalo ni Atty. Ferdinand Topacio nga gitudlo siya isip tigpamaba sa Partido Demokratiko Pilipino o PDP labot sa impeachment trial ni Bise Presidente Sara Duterte.
Diin ang nasangpit nga political party gipangulohan ni kanhi Presidente Rodrigo Duterte ug atol sa piniliay niadtong Mayo 12, kay 10 sa mga kandidato pagka-senador niini ang nipasalig nga ilang ibasura ang maong kaso.
Matud usab ni Topacio nga suportado sa PDP ang gibisugan sa Bise Presidente kalabot sa reklamo batok kaniya.
Ang pag-anunsyo ni Topacio usa ka adlaw human gibutyag sa Bise Presidente nga si Atty. Michael Poa ang iyang napilian nga tigpamaba alang sa impeachment trial niini.
Sa pikas bahin, gikondenar sa duha ka mga House leaders ang gibuhian nga pulong ni Sara Duterte nga “bobo” isip tubag sa mga pangutana bahin sa kanunay niyang pagbiyahe sa gawas sa nasud.
Gikanayon ni House Assistant Majority Leader and Manila 1st District Rep. Ernesto “Ernix” Dionisio Jr. nga ang maong pinulongan dili angayan sa usa ka lider sa nasud ug makadaut sa mga sumbanan sa pagka opisyal sa gobyerno.
Gihimug-atan usab nga ang mga opisyal sa gobyerno gilauman nga mahimong modelo, labi na sa mga batan-on.
