Tulo ka bulan pagkahuman gipatuman sa Australia ang pagdili sa social media alang sa mga ubos sa 16 anyos, gipakita sa usa ka pagtuon nga kadaghanan sa mga batan-on naggamit gihapon sa nagkalain-laing online platform.
Sumala sa eSafety, ang internet safety regulator sa Australia, dili kaayo epektibo ang pag-verify sa edad sa mga social media platform, busa daghang menor de edad ang nakasulod ug nakahimo gihapon og bag-ong mga account.
Gipadayag usab sa maong pagtuon nga halos walay pagbag-o sa paggamit sa social media sa mga bata nga nag-edad 10 hangtod 15 anyos, tulo ka bulan human gipatuman ang maong balaod.
Bisan man nga mikunhod ang gidaghanon sa mga bata nga adunay kaugalingong account, labaw sa 80 porsyento gihapon ang padayong naggamit sa mga platform sama sa YouTube, TikTok, Snapchat, Facebook, ug Instagram.
Tungod niini, nagpadayon ang imbestigasyon sa gobyerno sa Australia batok sa pila ka dagkong kompanya sa teknolohiya kalabot sa ilang posibleng paglapas o dili pagsunod sa bag-ong balaod.
Kahinumdoman nga ang Australia ang pinakauna nga nasod nga nagpatuman og nationwide ban sa social media alang sa mga nag-edad ubos sa 16 anyos, isip lakang sa pagpanalipod sa kahimsog ug kaayohan sa mga batan-on.
