CEBU – Patay ang usa ka vendor samtang 10 ang naangol dihang ang bus nga ilang gisakyan nabangga sa bungtod sa Bilar, Bohol Province niadtong Huwebes sa buntag, Disyembre 8, 2022.
Giila ang biktima nga si Erlinda Anob, 69-anyos, kinsa padulong sa dakbayan sa Tagbilaran.
Wala pa makuha sa kapolisan ang ngalan sa 10 nga nasamdan samtang gidali sa pagdala sa lainlaing mga tambalanan.
Matod ni PLT. Virgilio G. Doria, ang hepe sa Bilar Police Station, nga ang Mountain Eagle Transit bus nga gimaneho ni Joseph Salem Ratilla, 39, bag-o lang misulod sa man-made forest sa Barangay Aurora sa maong lungsod dihang nabantayan ni Ratilla nga wala na moandar ang brake.
Matud sa Driver nga wa siyay laing mahimo gawas sa pagpangita og lugar nga mabanggaan sa bus, hinungdan nga iyaha kining gibangga sa kilid sa pangpang, gumikan kay sa pikas nga bahin lalom na nga parti.
Matod ni PLT. Dorio nga ila nang giandam ang kaso batok kang Ratilla, kinsa anaa sa ilang kustodiya.
