MANDAUE, Cebu – Dili na makapadayon sa iyahang iligal nga transaksyon ang usa ka bag-o lang nahimong high value target human nga nasikop sa kapulisan sa buybust operation sa Sitio Maharlika, Barangay Tipolo, dakbayan sa Mandaue, kaganihang kaadlawon.
Giila ang nasikop nga si Dave Natividad, 30 anyos ug residente sa Barangay Calamba, dakbayan sa Sugbo.
Basi sa impormasyon nga gikan sa CDEU-Mandaue, giingong bag-o lang nalakip si Natividad sa ilahang listahan isip high value target.
Sa gipahigayon nga buybust operation, nakuha sa City Drug Enforcement Unit (CDEU) sa dakbayan sa Mandaue, ang 22 ka medium pack nga shabu, usa ka mahalon nga cellphone, duha ka 500 peso bill isip buybust money, ug ang pribado nga sakyanan sa subject.
Adunay gibug-aton nga 2,000 grams ang nakuha nga shabu ug gibana-bana nga mukabat sa P13.6 million.
Sa pagkakarun, naka-detain na ang subject sa Mandaue City Police Office samtang gipasaka ang kaso nga kalapasan sa RA 9165 o ang Comprehensive Dangerous Drugs Act of 2002.
