Mainiton nga giabi-abi ni Pope Leo XIV ang bag-ong Ambassador sa Pilipinas sa Holy See, nga si Raphael Perpetuo Mercado Lotilla, sa Vatican niadtong Hulyo 1, 2026.
Ang duha nagpahigayon og pormal nga meeting human gipresentar ni Lotilla ang iyang mga credentials o opisyal nga dokumento nga nagpamatuod sa iyang pagkatudlo isip representante sa Pilipinas sa Holy See.
Si Lotilla usa ka kanhi kalihim sa Department of Environment and Natural Resources (DENR), ug nagsilbi usab nga kalihim sa Department of Energy sa duha ka lain-laing administrasyon.
Nigradwar siya nga adunay mga degree sa Psychology, History, ug Law gikan sa University of the Philippines Diliman, ug nakakuha og Master of Laws gikan sa University of Michigan sa Estados Unidos.
Gawas sa pagka-abogado ug propesor, si Lotilla nagserbisyo usab sa lain-laing mga posisyon sa gobyerno ug akademya, lakip ang National Economic and Development Authority (NEDA), ug ang Power Sector Assets and Liabilities Management Corporation (PSALM).
