Gisumite sa International Criminal Court’s Registry ngadto sa Pre-Trial Chamber ang pangalan sa bag-ong associate counsel ni kanhi Presidente Rodrigo Duterte.
Diin si Dov Jacobs maoy bag-ong associate counsel sa kanhi presidente nga kasamtangang gitanggong sa ICC detention facility sa The Hague, Netherlands.
Sumala sa ICC registry, ang lead counsel ni Duterte, nga si Nicholas Kaufman, ang nihangyo nga si Jacobs himoong “associate counsel.”
Nag-atubang si Duterte sa mga kasong crimes against humanity tungod sa giingong dugoong pagpatuman sa war on drugs.
Una nang misaad si Kaufman og lig-on nga depensa sa kaso sa kanhi presidente.
Gikompirmar usab sa abogado nga giingnan sila ni VP Sara nga paspasan ang proseso sa kaso sa iyang amahan tungod kay nabalaka siya sa panglawas niini.
