CEBU – Gimandoan ni PHILIPPINE National Police (PNP) Chief Gen. Rodolfo Azurin Jr. ang bag-ong nabutang nga direktor sa Police Regional Office sa Central Visayas (PRO 7) nga dugangan ang gidaghanon sa mga barangay sa rehiyon nga ideklarar nga “drug cleared.”
Gihatag ni Azurin ang kamandoan human si PRO 7 Director Brig.Gen. Roderick Augustus Alba pormal nga nalingkod kaniadtong Huwebes, Oktubre 13, 2022.
Matod ni Azurin nga kinahanglang ipadayon ni Alba ang momentum nga nasugdan na sa iyang gisundan nga si kanhi PRO 7 director Brig. Gen. Roque Eduardo Vega, ug tutok sa pagsumpo sa krimen ug solusyon sa krimen sanglit ang Central Visayas usa sa mga sentro sa ekonomiya sa nasod nga angayang panalipdan gikan sa mga kriminal nga elemento.
Gipasabot ni Azurin nga ang usa ka malinawon ug lig-on nga lugar makadani sa mga tigpamuhunan ug mga turista nga makapalambo sa ekonomiya niini.
Matod ni Azurin nga masaligon siya nga makaya ni Alba ang mga hagit sa umaabot, ilabi na kay ang naulahi nailhan nga kugihan ug maayo sa iyang trabaho.
Niadtong Huwebes, pormal nga ni-asumer si Alba sa katungdanan isip direktor sa PRO 7 human pormal nga niretiro si Vega sa serbisyo sa kapolisan sa samang adlaw.
Sa wala pa nahimong direktor sa PRO 7, si Alba maoy hepe sa PNP Public Information Office.
Dugang pa, nga si Alba usab sakop sa Philippine National Police Academy “Tagapagpatupad” Class of 1992.
Ang turnover of command, gipahigayun sa PRO 7 headquarters sa may Osmeña Boulevard sa dakbayan sa Sugbo, gipangulohan ni Azurin.
Samtang sa habig ni Vega iyang panamilit nga pakigpulong, gipasalamatan ang mga personahe sa PRO 7 nga nahimong sayon ang iyang trabaho tungod sa ilang kahago.
