Gibasura sa korte sa Pasig ang bail petition nga gisang-at ni dismissed Bamban, Tarlac Mayor Alice Guo ug uban pa alang sa kasong qualified human trafficking.
Mao kini ang gikumpirma ni Prosecutor General Richard Fadullon.
Matod sa korte sa Pasig, si Guo ug ang ubang mga akusado niini kay wala tugoti nga makapiyansa sa maong kaso tungod kay lig-on ang mga ebidensya nga gipresentar sa prosekusyon batok kanila atol sa gipahigayon nga bail hearing.
Ang kaso batok kang Guo ug uban pa kay nagusgod sa pag-raid sa Philippine Offshore Gaming Operator (POGO) hub sa Bamban, Tarlac niadtong Hunyo diin kapin sa 800 ka mga Filipino ug langyaw nga gituohang biktima sa human trafficking ang naluwas sa mga awtoridad.
Sa pagkakaron, si Guo nagpabilin nga gitanggong sa Pasig City Jail Female Dormitory ug wala pa’y komento ang kampo ni Guo sa desisyon sa korte.
