Giduso nila House Majority Leader Sandro Marcos ug Speaker Bojie Dy ang House Bill No. 10430 o ang Systems Loss Charge Abolition Act.
Ang maong balaodnon nagtumong sa pagtangtang sa system loss isip lahi nga bayranan sa binulan nga bayranan sa kuryente.
Ubos sa balaodnon, ang mga gasto nga resulta sa pagpangawat sa kuryente, depektibong mga metro, dili episyenteng koleksiyon, kakulang sa maintenance, dili episyenteng operasyon, ug uban pang pagpabaya sa mga distribution utilities dili na mahimong ipasa ngadto sa mga konsumidor.
Kung diin, tugutan lamang ang Energy Regulatory Commission (ERC) sa pag-aprubar sa pagbawi sa makatarunganon ug gikinahanglang mga gasto nga direktang may kalabotan sa husto ug episyenteng paghatod sa serbisyo sa kuryente.
Gisugo usab ang ERC sa pagpatuman sa mga reporma pinaagi sa hugna-hugnang implementasyon, nga gilauman nga mahuman sulod sa tulo ka tuig gikan sa pagpatuman sa implementing rules and regulations (IRR).
Ang ahensya kinahanglan usab nga magtakda og minimum efficiency standards alang sa mga distribution utilities.
Kung mapatuman na, ang ERC mopagawas sa mga implementing rules sulod sa 90 ka adlaw, ug ang balaod moepekto 15 ka adlaw human sa pagmantala niini.
