Gipaambit ni Barangay Mabolo Chairman Atty. Daniel Francis Arguedo, ang responsableng pagdumala sa basura ngadto atubangan sa mga miyembro sa konseho sa Dakbayan sa Sugbo, human kini giimbitar aron pagpadayag usab ug paghatag og suhestiyon sa pagdumala problema sa basura.
Sa sesyon sa Sangguniang Panlungsod sa Cebu City niadtong Oktubre 6, 2026, giimbitar si Barangay Mabolo Chairman Atty. Arguedo aron ipaambit ang mga pamaagi sa barangay sa responsableng pagdumala sa basura, gumikan kay dugay na kining gitiyabaw nga problema sa mga Sugboanaon.
Atol sa iyang speech, iyang gihimug-atan nga daghan na kaayu og mga balaod ang napasar sa pagpakigbatok sa basura sa Dakbayan, apan dili gayud kini hingpit nga igo aron masulbad ang hagit sa basura, iyang gidugang ang kamahinungdanon sa pagbaton og “political will” aron sa hingpit nga pagkab-ot niini.
Gisuportahan ni Atty. Arguedo ang proposed ordinance ni Cebu City Councilor Joel Garganera bahin sa pag-require sa mga establisemento sa Cebu City og recycling bins ug deposit-return scheme. Iyang gi rekomendar nga dili lamang ang mga establisemento ang tutokan kundili ang pagpalapad sa waste management system pinaagi sa pagtukod og waste management sites sa matag sitio, susama sa pamaagi nga gipatuman sa Barangay Mabolo.
Matod niya, ang desentralisadong sistema makatabang sa pagkunhod sa landfill waste ug gasto, samtang mapalambo ang recycling ug resource recovery ug maghatag og dugang pondo alang sa healthcare, scholarship, ug uban pang serbisyo sa komunidad.
