Gipahibalo sa aktres nga si Bea Alonzo ang iyang desisyon nga tapuson ang kaso sa cyber libel batok sa entertainment reporter nga si Cristy Fermin pinaagi sa pagpasaylo kaniya.
Sumala sa opisyal nga pahayag gikan sa Garcia Elauria Ruanto & Associates (GERA), gidawat ni Bea ang public apology gikan ni Fermin ug sa iyang mga co-host nga sila si Wendell Alvarez ug Romel Villamor, kinsa gikasuhan usab sa samang kaso.
“After two years of legal proceedings & with the case pending before the Regional Trial Court, this matter has run its course under the law. The process has not been easy for any party involved. It has required accountability, reflection & fortitude,” matud ni Atty. Joey Garcia, abogado ni Bea.
Gipasiugda ni Garcia nga ang desisyon sa iyang kliyente dili usa ka lakang sa pag-atras, apan usa ka lakang sa resolusyon sa pagpasaylo.
Mahinumduman nga si Bea nisang-at og kasong cyber libel niadtong 2024 batok kang Fermin, Alvarez, ug Villamor tungod sa giingong mga pahayag nga nagdaot sa ilang programa sa YouTube.
Sumala sa aktres, gipili niya nga mopadayon human sila nangayo og public apology.
Dugang pa, gusto usab sa aktres nga ipunting ang iyang trabaho sa mga adbokasiya niini ug pagdasig sa uban, labi na kadtong nag-atubang sa ilang kaugalingon nga hilom nga mga pakigbisog.
