CENTRAL VISAYAS-Ipahigayon ang Buhay Ingatan, Droga’y Ayawan (Bida) challenge 2023 sa Hoops Dome sa dakbayan sa Lapu-Lapu karong adlawa Sabado, Hulyo 29, 2023, ug gipaabot nga mosalmot ang 30,000 ka partisipante.
Magsugod ang kalihokan alas 4 sa kaadlawon pinaagi sa fun run, zumba, ug taebo exercises, sundan sa Serbisyo Caravan sa Hoops Dome, diin libre ang legal ug medical services.
Pangunahan ang Bida fun run nila ni Mayor Junard “Ahong” Chan ug Interior Secretary Benjamin Abalos.
Mosalmot ang lain-laing bahin sa katilingban, apil na ang sektor sa kabatan-onan, simbahan, force multipliers gikan sa Armed Forces of the Philippines, Bureau of Jail Management and Penology, ug uban pa, aron ipakita ang ilang suporta sa gobyerno sa pakigbatok sa ilegal nga drugas.
Hatagan usab og award ang aktibong barangay drug abuse council sa Central Visayas tungod sa ilang kontribusyon sa pagpaubos sa demand sa drugas.
