Miabot na ang Presidente sa Estados Unidos nga si Joe Biden ug kanhi Presidente Donald Trump sa Atlanta, Georgia usa ka oras sa wala pa ang ilang debate sa pagkapresidente nga misangpot sa ilang rematch alang sa 2024 nga eleksyon.
Nahimamat sa mga lokal nga Demokratiko ang 81-anyos nga presidente sa dihang ang Air Force 1 mitugpa sa Dobbins Air Reserve Base sa Marietta, samtang ang 78-anyos nga kanhi presidente sakay sa usa ka pribadong jet o ang iyang gitawag nga “Trump Force 1.”
Ang debate gitakda sa alas 9:00 sa gabii sa Atlanta, Georgia (9:00 sa buntag dinhi sa Pilipinas karong Biyernes.)
Kining reunion sa duha maoy gibantayan sa tibuok Amerika tungod kay wala pa gyu’y record nga adunay kasamtangang presidente nga nagdebate batok sa iyang gisundan.
Mao usab kini ang unang higayon nga ang duha motungtong sa debate stage human sa ilang debate upat ka tuig na ang milabay.
Sa ikaduhang hugna sa samang debate niadtong 2020, nitaas ang tensyon kay wala paman sila magkita.
Dili sama sa nangaging mga debate, kini ipahigayon karon sa cable television studio nga walay live audience subay sa hangyo sa Biden camp.
Molungtad kini og 90 minutos, nga adunay duha lang ka commercial break, ug ang ilang mikropono mapahilom lamang kon turno na nila sa pagsulti.
Human karong adlawa, mag-atbang na usab sila sa Septiyembre alang sa ikaduhang hugna sa debate.
