Gikatakdang i-forfeit sa gobyerno ang binilyon ka pesos nga balor sa mga yuta gikan sa gidudahang Chinese drug lord nga si Willie Ong ug sa iyang mga kauban.
Matod ni Surigao del Norte Rep. Robert Ace Barbers, Land Registration Authority (LRA) ug Office of the Solicitor General (OSG) mopasaka og forfeiture proceedings batok kang Ong, sa iyang real estate firm nga Empire 999 ug sa iyang mga kauban.
Matod niya, ang ilang pagpanag-iya sa 55% sa Empire 999 Realty Corporation usa ka direktang paglapas sa constitutional limitation sa 60-40 equity.
Dugang pa sa magbabalaod nga ang LRA ug OSG misaad sa maong lakang atol sa hearing sa House Dangerous Drugs Committee niadtong Miyerkules diin nadiskubrehan sa komite nga si Ong ug ang iyang mga kauban, nga napakyas sa pagtambong sa hearing, mga Chinese national nga nagpaka-Pilipino.
Kalabot niini, matod ni Cong. Barbers nga kinahanglang kanselahon dayon sa Department of Foreign Affairs ang PH passports ni Willie Ong ug mga kaubanan samtang ang SEC registration sa Empire 999 Realty Corporation kinahanglang tangtangon ug buwagon ang korporasyon.
Kon kahinumdoman, tag-iya sab si Ong sa usa ka bodega sa Mexico, Pampanga diin nasakmit ang 530 kilos nga shabu nga mobalor og P3.6 bilyones niadtong Septiyembre sa miaging tuig.
Sa dihang gipatawag siya sa imbestigasyon sa House of Representatives, wala siya magpakita sa makadaghang higayon.
Gituohan usab nga si Ong, kansang Chinese nga ngalan mao si Cai Qimeng, milayas sa nasud niadtong Oktubre 2023, gamit ang iyang Chinese passport.
Dili usab makompirmar sa mga otoridad ang nahimutangan sa mga kauban ni Ong nga giila nga sila si Edi Tai Yang, Jack Tai Yang, Michelle Santos Sy, Elaine Chua ug uban pa.
Giila ang 320 ka yuta nga gipalit ni Ong sa Mexico, San Fernando, ug Angeles City sa Pampanga; Nueva Ecija, Cabanatuan City, Aurora Province, Bulacan, Cavite City, Tagaytay City, Iloilo City, Lingayen, Pangasinan, Mandaue City, Lapu-lapu City, Valenzuela City, Quezon City, Rizal, Muntinlupa City, Taguig City, Makati City, Malabon , Parañaque City, Manila City, Davao del Norte, Isulan, Sultan Kudarat, ug Tabuk, Kalinga, Apayao.
Kining tanan nalambigit sa mga kompanya nga gitukod sa laing gidudahang Chinese drug lord, si Michael Yang, kinsa gitudlo ni kanhi Presidente Rodrigo Duterte isip presidential economic adviser.
