Giandam na sa Bureau of Jail Management and Penology (BJMP) ang detention cell ni Senador Jinggoy Estrada sa New Quezon City Male Dormitory sa Payatas.
Gipasalig ni Interior Secretary Jonvic Remulla nga andam sila kung ang warrant of arrest alang kang Estrada sa kasong plunder ipagawas sa Fifth Division sa Sandiganbayan.
Ang Senador nag-atubang og kasong plunder nga naglambigit sa P573 milyon nga kantidad sa giingong kickback gikan sa nagkalain-laing flood control projects.
Kahinumduman nga niadtong Biyernes, si Estrada nagpiyansa og P90,000 alang sa iyang kasong graft uban sa kanhi kalihim sa Department of Public Works and Highways nga si Manuel Bonoan sa Sandiganbayan Second Division.
Hinuon, giklaro ni Remulla nga anaa pa sa Sandiganbayan ang pagdesisyon kung asa ibutang si Estrada.
