Nipasalig ang Bureau of Jail Management and Penology (BJMP) og patas nga pagtratar sa tanang persons deprived of liberty (PDLs) human sa pagpahimulos sa “e-dalaw,” usa ka online visitation program sa detained government contractor nga si Sarah Discaya.
Sumala sa tigpamaba sa BJMP ug Jail Superintendent nga si Jayrex Bustinera, niadtong miaging Pasko, ang pamilya ni Discaya wala mobisita kaniya sa pisikal apan pinaagi sa ilang e-dalaw system.
Miingon siya nga ang iyang mga abogado lamang ang direktang nakigsulti kaniya, ug gipasabot usab sa opisyal sa BJMP nga ang tanang mga binilanggo adunay parehas nga pribilehiyo sa paggamit sa e-dalaw.
Giinsistir usab ni Jail Supt. Bustinera nga ilang gitratar si Discaya sama sa ubang mga binilanggo, subay sa direktiba ni Justice Secretary Jonvic Remulla ug BJMP Chief Jail Director Ruel Rivera nga nagdili sa bisan unsang klase sa VIP treatment.
Sa bahin sa BJMP, ilang gipasalig sa publiko nga ilang gitratar ang tanang PDLs nga patas ug walay VIP treatment.
Si Sarah Discaya kasamtangang gitanggong sa Lapu-Lapu City Jail Female Dormitory ubos sa hurisdiksyon sa BJMP tungod sa mga kaso sa graft ug malversation nga may kalabotan sa mga anomalous flood control projects.
