Gipangulohan sa Pilipinas ang pagdawat sa mga lider sa Southeast Asia alang sa ika-48 nga ASEAN Leaders’ Summit, diin nanawagan si Presidente Ferdinand R. Marcos Jr. alang sa mas lig-on nga kooperasyon taliwala sa mga hagit sa kalibutan.
Matud sa Presidente, bisan siyam na ka tuig ang milabay sukad sa katapusang pag-host sa nasud niadtong 2017, nagpabiling lig-on ang rehiyon apan dako pa ang kinahanglan nga trabaho tungod sa nagkagrabe nga kahimtang sa kalibutan diin importante ang dinalian ug malahutayong pagtinabangay.
Giila ni Marcos ang tulo ka prayoridad nga bahin alang sa maong summit nga mao ang siguridad sa enerhiya, siguridad sa pagkaon, ug ang proteksyon sa mga lungsoranon sa ASEAN.
Giabi-abi usab niya ang Timor-Leste isip hingpit nga miyembro sa regional bloc, butang nga nagpakita sa padayon nga kalabutan sa kooperasyon sa rehiyon ug ang hiniusang pasalig sa mithi sa multilateralism.
Tinguha sa Pilipinas nga giyahan ang ASEAN ngadto sa usa ka malinawon, mauswagon, ug nakasentro sa katawhan nga kaugmaon.
