Niawhag si Pangulong Ferdinand R. Marcos Jr. sa mga Pilipino nga dili mapuol sa paghigugma, pagpili, ug pagpakigbisog alang sa Pilipinas, dungan sa paghandum sa kagawasan gahapong adlawa.
Sa iyang mensahe, gidasig sa Presidente ang mga lungsuranon nga palawmon ang kahibalo, magmabinantayon sa kamatuoran, ug gamiton sa saktong pamaagi ang katakus imbes nga sa dautan.
Gihatagan usab og gibug-aton sa Presidente ang kamahinungdanon sa makiangayon nga pakigbugno matag adlaw nga dili pamintahanan ang gihagoan sa uban, ug ang pagpili sa kaayohan sa nasod sa dili pa ang interes sa pipila ka indibidwal.
Matod ni Presidente Marcos, ang pagpabilin nga matinud-anon sa maong mga tinguha maoy mosiguro nga ang mga sunod nga henerasyon makasunod og usa ka nasod nga mas lig-on, makatarunganon, ug madasigon ubos sa usa ka tumong alang sa usa ka “Bagong Pilipinas.”
Gipasabot pa sa Presidente nga kinahanglang gamiton ang maong mga pagtulun-an aron mapalambo ang nasod ug mapalapdan ang kagawasan taliwala sa mga hagit sama sa korapsyon, pagkabahin-bahin, kawad-on, mga panghitabo sa kalibutan, ug ang hulga sa climate change.
Bisan pa niini, nagpabilin ang iyang pagsalig ug paglaum sa kahanas, kakugi, ug kaayo sa kaliwat nga Pilipino, ilabi na sa abilidad niini nga mobarog sa katarong, magpakabana sa isigkaingon, mobangon gikan sa mga pagsulay, ug magkahiusa sa panahon sa mga kalamidad.
