Miawhag si Cebu City Mayor Nestor Archival sa mga Sugboanon nga motabang sa mga nabiktima sa 7.8 Magnitude nga Linog sa Mindanao nga nahitabo sa Sarangani diin pipila ka mga edipisyo og panimalay ang nangadaot.
Atol sa usa ka interbyu human sa ika-128 nga selebrasyon sa Adlaw sa Kagawasan sa Pilipinas, si Archival nanawagan sa mga Sugbuanon ug mga lokal nga institusyon nga mohatag og tabang sa mga komunidad sa Mindanao nga naapektuhan sa bag-ohay nga mga kalamidad.
Siya miingon nga panahon na nga balusan sa Sugbo ang tabang ug suporta nga gihatag sa Mindanao kaniadto, nga nagpasiugda sa responsibilidad sa mga Pilipino sa pagtinabangay sa panahon sa panginahanglan.
Giawhag usab ni Archival ang publiko sa pagdonar og mga relief goods imbes nga kwarta aron masiguro ang mas paspas nga tabang alang sa mga apektadong komunidad.
Gipasabot niini nga samtang gidawat gihapon ang mga donasyon nga kwarta, ang mga produkto mahimong mas paspas nga mahatud sa mga nanginahanglan tungod kay ang mga donasyon nga kwarta nga gipaagi sa mga proseso sa gobyerno mahimong mas dugay pa magamit alang sa mga relief operations.
Gidugang sa mayor nga ang mga donasyon mahimong dad-on sa lugar atubangan sa Legislative Building, diin ang gobyerno sa siyudad nangolekta og tabang alang sa mga komunidad nga naapektuhan sa linog sa Mindanao.
