CEBU CITY- Giisa ang Blue Alert Status sa dakbayan sa Sugbo alang sa pagpangandam sa pagsingabot sa epekto sa Tropical Depression BASYANG sa syudad sa mga umaabot nga mga adlaw.
Kini ang nahukman atol sa nahitabong panagpulong niadtong Miyerkules, Pebrero 4 sa Cebu City Disaster Risk Reduction and Management Council (CCDRRMC) kauban si City Mayor Nestor Archival Sr ug Disaster Chairman Councilor Dave Tumulak.
Sa pagpasabot ni Konsehal Tumulak atol sa eksklusibong pakighinabi sa Bombo Radyo Cebu News Team niini nga ang pagbutang sa dakbayan sa Blue Alert Status kay nag-aghat sa mas taas nga monitoring ug preparedness sa syudad diin ang mga Barangay Disaster Councils sa direktibang pag-activate sa ilang mga preparedness plans ug pag-standby sa mga posibleng emergency response.
Agi sab og tubag niini, ang dakbayan kay gibahin sa duha ka sektor sa North ug South aron istatehikong mapakatap ang mga disaster response teams sa ilang mga personahe ug ekipo sa higayong gikinahanglan ang hinadaling pag-responde.
Gidugang ni Tumulak nga ang mga suba sa dakbayan kay anaa sa mabaw ang gilawmon tungod sa nakalabayng banlas sa Bagyong TINO niadtong Nobyembre 2025 busa ilang hugot nga ginamonitor karon ang water level sa mga agianan sa tubig nga posibleng makaapektar sa mga residente sa dakbayan.
Giawhag sa mga opisyal ang mga lumulupyo sa dakbayan sa pagpangandam sa mga batakang gikinahanglang nga msa suplay sama sa pagkaon ug tubig ingon man ang pagsiguro lig-on ilang mga tagsa-tagsa ka panimalay ug sa pagpabiling alerto ilabi tong mga residente sa mga flood-prone ug landslide-susceptible areas.
