CEBU CITY — Gipasabot sa Disaster Risk Reduction Management Office sa probinsya sa Bohol (BDRRMO) ang rason ngano nga gipaubos sa state of calamity ang pipila sa ilang mga lungsod.
Sigon ni Anthony Damalerio, head sa Bohol DRRMO, nga mideklarar ang Provincial Disaster Council og state of calamity tungod sa epekto sa El Niño diin dunay nay shortage sa water supply human nanga-uga na ang ilang mga dam nga maoy tinubdan sa ilang tubig.
Nakita nga anaa na kini sa kritikal level kung diin ang mga mag-uuma wala na nakatanom ug wala na usab naani.
Siyam ka LGU sa Bohol ang gipaubos sa State of Calamity lakip niini ang Sierra Bullones, Pitogo, Candijay, Antequera, ug uban pa.
Hinoon gitino ni Damalerio nga all set na ang mga lakang subay sa pagpa-ubos niini sa state of calamity sanglit duna na matud pay team nga naglibot sa kalungsuran para usab mahatud ang pundo nga kuhaon gikan sa calamity fund.
Mi-commit na usab ang DSWD para maghimo og relief operation sa mga mag-uuma.
Nasyran nga muabot sa P257 million ang danyos nga namugna sa El Niño sa naasoy nga mga probinsya partikular na niini ang kahumayan nga maoy dako ang epekto.
Dugang usab niini, gihandum usab sa Bohol ang ika-6 nga tuig nga kasumaran sa nahitabong 7.2 magnitude nga linog niadtong Oktubre 15, 2013.
